گؤزو ياشلي آراز

X

گؤزو ياشلي آراز

گؤزو ياشلي آراز

گونئ آذربايجانا دوشونجه وئرن سوزلر

	آذربايجان- آذربايجان
آذربايجان روحوم جانيم دامارلاردا گزن قانيم سهنديله ساوالانيم آذربايجان- آذربايجان لعل ومرجان داغي- داشي خائين چيخان يار يولداشي ايرانيمين ديل سيز باشي آذربايجان- آذربايجان قورتارمييان چولو گولدن ظولميله قيريلان بئلدن قارداشلارين وئرن الدن آذربايجان- آذربايجان طلسمده قاليب اركين شام قازانين قيلدين تركين قازيلار گوي مچيد كوكين آذربايجان- آذربايجان يادلار دئيير يالان سوزلر كور اولسون پيس باخان گوزلر عاقيل ايشين سونون گوزلر آذربايجان- آذربايجان هاني صابير، هاني معجز يارادسينلار سوزده معجز ايستكلري يازسينلار دوز آذربايجان- آذربايجان هاردا قاليب ستارخانين توپال تيمور تك اصلانين كيم آلدي بابكين قانين آذربايجان- آذربايجان افراسياب چنگيز هاردا ائل اوباميز قاليب داردا چاغير گلسينلر فريادا آذربايجان- آذربايجان قورولسون هر يئرده اوردو قاچيرداق ايتيله قوردو ازيليري اودلار يوردو آذربايجان- آذربايجان گويده اويناسين شمشيرلر باغيرسين شئر اورك شئرلر ائله يئتسين شان خبرلر آذربايجان- آذربايجان آزادليقين مارشين چالاق تانرييا دوز بنده اولاق وارليغيميزدان كام آلاق آذربايجان- آذربايجان هاني علي حكومتي اصلاح ائده بو امتي اجرا ائده عدالتي آذربايجان- آذربايجان عدالت له بيته ساواش ائللر اولا بوتون قارداش وطن اولا گول باشا باش آذربايجان- آذربايجان گولله وجهي بئجرده ك گول چه- چه وورسون سونا بولبول گول پاي ليياق زنبيل- زنبيل آذربايجان- آذربايجان دونيا ديمز بير قوروشا كوسو قالانلار باريشا اوتاي بوتايا قاريشا آذربايجان- آذربايجان (نجار اوغلو) اول گولوموز سئويب سئويله ائليميز قول قاناد آچا ديليميز آذربايجان- آذربايجان نجاراوغلو
+ نوشته شده در یکشنبه 31 تیر1386ساعت 10:10 توسط آراز \|

	آخ نئجه كئف چكمه لي ايم ايدي!
آخ نئجه كئف چكمه لي ايم ايدي! اوندا كي اولاد وطن خام ايدي! اوز حق مشروعيني بيلمزدي ائل چهره ي حريته گولمزدي ائل گوزلريني بير كره سيلمزدي ائل غزته يه، ژورناله اييلمزدي ائل دائم ائشيتديكلري اوهام ايدي آخ نئجه كئف چكمه لي ايم ايدي! اولكه ده بونجا يوخ ايدي عيب جو نئيلرديگه گورونوردي نكو خلق ده ديداريميزه آرزو بيزده وارايدي نه گوزل آبرو حرمتيميز واجب اسلام ايدي آخ نئجه كئف چكمه لي ايام ايدي! ميللته چاتديقجا غم عياش ايديق حاكمه يار، آمره قارداش ايديق قبله ي طاعتگه اوباش ايديق هاردا باش اولسايدي اورا باش ايديق هر گئجه، هر گون بيزه بايرام ايدي آخ نئجه كئف چكمه لي ايام ايدي! گرچه ريا ايدي بوتون كاريميز كاريله برعكس ايدي كرداريميز ليك همان وارايدي مقداريميز حجت ايدي هر كسه گفتاريميز خلقين ايشي بيزلره اكرام ايدي آخ نئجه كئف چكمه لي ايام ايدي! عيبيميزي چولغالاميشدي عبا هر نه گليردي بوشاليردي قابا كيم نه قانيردي نه دي زهد و ريا ناخوشه خاك دريميزدن شفا صومعه ميز كعبه ي احرام ايدي آخ نئجه كئف چكمه لي ايام ايدي! بيزلرايديق خلقين اينانديقلاري پير هدايت دئيه قانديقلاري نور گورولردي قارانليقلاري بيزده ايدي جمله قازانديقلاري كيم بيزه پول وئرمه سه بدنام ايدي آخ نئجه كئف چكمه لي ايام ايدي! ايندي آداملار دئيه سن جن ديلر جن نه دي شيطان كيمي بي دينديلر لاپ بيزي اوسارلاديلار مينديلر آي گئچن ايام اولاسان اينديلر اوندا كي اولاد وطن خام ايدي آخ نئجه كئف چكمه لي ايام ايدي! ميرزا علي‌اكبر صابير
+ نوشته شده در یکشنبه 31 تیر1386ساعت 10:2 توسط آراز \|

	انقلاب خاطره لريم
بهمن انقلابيندان 2 ايل قاباق، من بيرينجي راهنمايي كلاسيندا درس اوخويوردوم. ايكي هفته ايدي، يئني تحصيل ايليندن اؤتوردو. معلم بيزه انشاء دئدي: انشاء‌نين موضوعسو(( تعطيلات تابستان را چگونه گذرانديدم)) يايي تعطيل لريني نئجه كئچيرديز؟ منيم بو موضوعدا بئينيمده بير كتاب سؤز واريدي، آنجاق اونو كاغيذ اوزه رينه گتيرمك چوخ چتين ايدي، بوندان باشقا توركجه دوشونوب، فارسجا يازماق منه چوخ چتين گليردي. چونكي من اؤز فيكيرلريمي، فارس ديلينده بيان ائده بيلميرديم اونا گؤره‌ده بيرتهر انشاء‌ني فارس ديلينده يازيب، سونرا انشاء‌مي بئله بير جمله‌ايله بيتيرديم: ((آنا ديليمده اوخوسايدايق من بو موضوعدا بير كتاب انشاء يازا بيلرديم.)) منه ائله گليردي دي كي، ادبيات معلم‌ميز، منيم بوسؤزومدن سئوينه جكدي، آمما او منه يامان بير قولاق بورماسي وئردي كي، گل گؤره‌سن. من ادبيات معلم ميميزين بو غير انساني رفتارينا اعتراض ائله‌ينده او منيم، اليمدن ياپيشيب، دفتره آپاردي. دفتر ده مدير، آيري جور منله ياناشدي. او مني اوقدر اللريمدن آغاج ايله ووردوكي، گل گؤره‌سن. من بو سؤزون اوستونده چوخ بتر دؤيولدوم. آنجاق بيلميرديم، نه اوچون نئيه دويولدوم. من اونون علتيني بير نئچه معلم دن سوروشدومسا، اونلارين جاوابي، سن فيكريني درس لرينه وئر، اوجور سؤزلرله ايشين اولماسين ايدي. نهايت 1357- نجي ايلين بهمن انقلابي ظفر چالدي. مجله‌لر، روزنامه‌لر آناديليمزده چيخاندان سونرا، من بيلديم‌كي، نه اوچون دؤيولوردوم. انقلابدان بير نئچه گون قاباق هر يئرده اولدوغوكيمي، بيزيم درس ييميز تعطيل اولموشدور. آنجاق من اوشاق اولسامدا، جاماعاتين اعتراض ميتينگ‌لرينده ياخيندان اشتراك ائديرديم. ديوارلاردا يازيلان توركجه شعارلار مني هرنه‌دن آرتيق سؤينديريردي. ياديمدان هئچ چيخماز، انقلاب ايكي گون قاليردي، بير نفر((اؤلوم اولسون شاها)) و قرآن بيزه هدف‌دي، سرمايه‌ي شرفدي، بختيارا راي وئره‌ن شاهداندا بي‌شرف‌دي شعارلاريني يازيب، برق آغاجينا ووراركن، بير نفر پاسبان (ژاندارم) اوزاقدان، او جاوانا دوراوردا گؤرسنه. نه ائلرم دئيديكده اعلان ووران اوغلان، ژاندارمين قورخوسوندان ديرماشيب، چيخدي برق آغاجينا ژاندارما اليندن باتوم آغاجين ديبينده دايانيب، گؤزله‌دي‌كي، اوغلان آغاجدان انسين و سورا اونو عمللي- باشلي دؤيسون. اوغلان آغاجدا قالسين. ژاندارمدا آشاغي‌دا اونو گؤزله مكده اولسون. بيزده بير نئچه نفر اوشاقلا، اليميزده اولان داشدان، كرپيچدن، نه وارسا، تينده دايانيب، ژاندارما طرف آتديق. ژاندارم بيزي قووالاماغا باشلادي. بيز قاچديق، شاهين عليهينه يولا سالينان اعتراض نمايشي گؤرنده، جمعتين ايچينده، مني دوين مديري گؤردوم كي، قابيق عوض ائله‌يه‌رك، اؤزونو انقلابچي گؤسترمك ايسته ييردي. نهايت انقلابدان سونرا، همين مدير بيزيم ادبيات معلم‌ميز اولدو. انشاء ساعاتي، من مقدمه‌ده، ايكي ايل انقلابدان قاباق بير مديرين الي ايله دويولدويومو يازديقدا، اونون رنگي آتدي. چونكي دئييرلر: سؤزو آت يئره، سؤز صاحبي اؤزو گؤتوره‌ر. بختيار : محمدرضا شاهين سون وزيري یازان: بهروز ايماني
+ نوشته شده در یکشنبه 31 تیر1386ساعت 9:54 توسط آراز \|

	گله‌جك بيزيمدير

+ نوشته شده در یکشنبه 31 تیر1386ساعت 9:45 توسط آراز \|

	جهل داغلاري
قالمايين اي اهل وطن جهل له گئيمه يين اندامه کفن جهل له جانيمي ياخديم اودا، من جهل له آه من الجهل وحالاته احرق عمري بحراراته جان نه ايميش، بيلمه ديم عالمده من آلديم اله تيغ، محرمده من قانيمي توکدوم يئره، بير دمده من آه من الجهل وحالاته احرق عمري بحراراته گاه باشيم آغريري گاهي گوزوم گاه اليم تيتريري، گاهي ديزيم اوز ائويمي جهل له ييخديم اوزوم آه من الجهل وحالاته احرق عمري بحراراته گئتديم حکيمه دئدي: آت، بازليغي سالميش آياقدان سني، قان آزليغي قان ايله دير چونکي کئفين سازليغي آه من الجهل وحالاته احرق عمري بحراراته ايگنه ني سوخدو قولوما، ووردي قان ياندي قولوم، ائيله ديم آه وفغان قورخورام آخير مني ييخسين بو قان آه من الجهل وحالاته احرق عمري بحراراته درديمه دوقتور ائده بيلمز علاج بيتدي پولوم، قوزادي باش احتياج ايش گوره بيلمز کي، عليل المزاج آه من الجهل وحالاته احرق عمري بحراراته درد معيشت قاپوسين باغلادي اهل وعياليم قاليب آج، آغلادي سينه مي بو جهل عجب داغلادي آه من الجهل وحالاته احرق عمري بحراراته یازان: شبسترلي معجز
+ نوشته شده در یکشنبه 31 تیر1386ساعت 9:39 توسط آراز \|

	وطن
نيچون آه ايله دين اي بلبل نالان وطن يادووا دوشدي مگر حال پريشان وطن خس و خاشاك باسيب گلشني گل لر ساراليب نيه بو حاله قاليب بس بو گلستان وطن نه ياتيبسان آييل اي ملت بيچاره آييل ساتير آخر وطني دشمنه اعيان وطن در و ديواريني قان ايله ييب الوان اي داد نه غم انگيزدي يارب بو شبستان وطن بالش نازه قويوب باشووي ناز ايلمه دور سوروني قورد داغيدار يوخلاسا چوپان وطن اجنبي ملكي دولوب بي سر و پا ملته نيه يا رب بئله خوار اولدي عزيزان وطن دشمن علميله بيزي ايله دي حمال اؤزونه كيم ذليل اتدي بيزي ؟ جهل ، آ مسلمان وطن وطنيز جسم دي سيزده وطنه جان كيمي سيز راضي اولمون قالا جانسيز وطن اي جان وطن وئره ليم ال اله تحصيل كمال ايليه ليم خواب غفلتدن آييلسين گره ك اخوان وطن اولمايوب شاد اوزي گولميوب افسوس ، افسوس او زماندان كي اولوب ’’ معجزه ’’ ايران وطن !!!! یازان: معجز شبستري
+ نوشته شده در یکشنبه 31 تیر1386ساعت 9:36 توسط آراز \|

	دوشونجه
كال آلما كيمي بير اوزو تورپاغا دوشونجه گوردوم كي ياتير هر اوتون آلتيندا دوشونجه گويلرده فلك لر دوشونور يئرده چيچك لر گوردوم دوشونور گوللره قونموش كپنك لر تورپاق دا آغاجلاردا هر شئي يارانيب وارليغا چئوريلمه دن اونجه باشدان- باشا، معنالي- معمالي دوشونجه یازان: بختيار وهاب زاده
+ نوشته شده در یکشنبه 31 تیر1386ساعت 9:29 توسط آراز \|

	قورخولو تهران
م . اعتماد گيت اي وطنيمده ايلين باغريمي آل قان ! گيت اي ايليين توپراقيمي ظلميله ويران سنسن مني آواره قويان اؤز وطنيمده بلبل لريني لال ايلين شن چمنينده سنسن ويرن اصلانلارا زندان لاري مسكن ، حق سؤز يازاني حق دييه ني محو ايلسن، سن حق صاحبنين سنسن ايدن حقيني پامال ، حق سؤز دانيشان وقتده حق سؤزلرين ابطال سنسن اولان هر دورده ظالملره ياور ! مظلوملارا زنداندا ووران قلبينه نيشتر بو خلقيميزي سنسن ايدن زار- پريشان ، سنسن ويرن حقسيزليغا هر عصرده امكان سن شيخ محمدلري سالدين يوزي اوسته ، سن قانه بويانديردين اوني حق سؤزو اوسته سالار ايله - سرداريمين آرامني آلدين ، حب الوطن اوستنده قارا توپراقا سالدون بو خلقميزين جهلنه سن باعث اولوبسان! باغلاردا آچان گللريني پاك يولوبسان سن ايستميرسن بولار اؤز حقينه چاتسين يا وارليغي اولسون باشيني باشلارا قاتسين هر ظلم- ستم گلدي الوندن ايله دين سن گيزلينده اولان فكري چيخارتسين ئوزه بيردن
+ نوشته شده در شنبه 30 تیر1386ساعت 10:37 توسط آراز \|

	آنا ديلي نين دستاني
ميرهدايت حصاري گلين بير دستان دئييم ، آنا ديلي حاقين دا نه يئنيش لر، يوخوش لار، گؤروبدور اؤز واقتيندا نئجه عصيرلر بويو ، اؤز يولونو تاپمادي اسيرليگه سيخيشدي ، آزادليقا چاتمادي آمما قوي اول دئييم بيرجه مشهور تاپماجا چوق ساده كي اوشاق دا باشارار اونو آچا نه دير؟ هامميني به زه ر،آمما اؤزو لوت گه زه ر بلي ، اؤزو لوت گه زه ر،آمما هاميني به زه ر فيكير لشيب جاواب وئر،تئز دئنه كي او نه دي تاپانمادين قوي اؤزوم،دئييم كي او ((ايگنه )) دي آمما اونا بير آيري جاواب دا من تاپميشام چوخلو فيكير ده ن سورا بو جاوابا چاتميشام او بيزيم خالقيميزدي اؤزگه لري بزييه ر اؤز ديلي اولا- اولا،اؤزگه ديلده سؤز دييه ر عرب، فارسين ادبين پارلانديريب وار ائيله ر اؤز ادبين دن قاليب ، اؤز ديليني خوار ائيله ر سايسام اونون خدمتين فارس ديلينه ، علمينه اوندا قبول ائدره سن ، احسن دييه رسن منه هاردا بؤيوك دانشمند،شاعر فارسي دا واردي آختارسان گؤره جكسن‌، او بيزدن يادگاردي هر رشته ده،هر ايش ده چوق ماراقلي كتاب لار توركون بيليجي لري ، فارس ديلينده يازيبلار قوي بير ساييم نئچه سين ، نمونه چون اونلاردان سن اؤزونده آختارسان،مين لرجه سين تاپارسان موسيقي ده ، طب ده ، لغت ده‌، نقاشليق دا تاريخ ده، جوغرافي دا، شعرده، خطاطليق دا بيز فارس لارا وئرميشيك چوخلو حاذيق حكيم لر محقق لر، عالم لر، شاعرلر، منجم لر فارسين ادبياتين تورك شاعري يوكسه لتدي ادب آسمانيني ، ستاره يه غرق ائتدي تبريز ايله شيرواندان چيخان شاعري سايسان فارسين شاعرلرينين آرتيق اولار ساييندان ارده بيل دن،طسوج دان،شبستردن،خالخالدان هله قيراقدا قالسين ، شومالي آذربايجان محمد فضولي ، صائب ايله خاقاني ( رحمت ) كوزه كناني ، مجير بيلقاني قطران،همام تبريزدن، مراغه لي اوحدي شبسترلي شيخ محمود، نظامي گنجوي سيد احمد هاتف، شاه فضل اله نعيمي انسانا قيمت وئره ن ، حق شاعري نسيمي فلكي شيرواني، لعلي ، قاسم انوار اشرف مراغه اي ، قوام الدين ذوالفقار شاه اسماعيل ( خطائي ) اونون اوغلو سام ميزا بير آيري شاعر اوغلو شاهزاده بهرام ميرزا صفويه شاهلاري ، هامميسي شاعر ايدي قاجارلاردان دا بعضي بو ايشده ماهر ايدي بابا كوهي معروف، عتيقي تبريزي (( الهي )) بيرده (( جامي )) شكيبي تبريزي حسام الدين چلبي ، حاجي محمد عصار ابوالعلا، حقيقي ، هم صادقي افشار ((سالم))، ((تاثير)) هم ((شريف)) تبريز شاعرلريندن او شاعرلر بئجه ره ن ، علم وهنر شهريندن موللا مراد طسوج لو، حسين كوزه كناني خوي دان حسام و مفتون ، هم سالك ايله فاني ((جرعه))، ((ميرعلي خاوري))، ((شرف الدين رامي)) هم ((لطفعلي دانش))،((سهوي))، ((باقي))و((نامي)) شيخ الرئيس (حيرت) هم شاه عباس ثاني خانيم لاردان پري خان‌، پروين اعتصامي ((مهستي))، ((ماهي خانيم))، (( گوهرآذربايجاني)) اوگول اوزلو شيرين سؤزگؤزل گؤيچك لر هاني؟ آغابگيم جوانشير ، خديجه سلطان خانيم خاتين لاردان بيري ده تبريزلي حئيران خانيم تبريزين گول لرينده ن بيرده خانيم ((جمالي)) شهره ي آفاق اولان جمالي هم كمالي ايرج ميرزا ، طالبوف ، فتحعلي آخوندزاده اجازه وئر باشيني ، آغريتماييم زياده بونلار ققديم كي لردي،جديدلرين مين لري فارسين ادب گولشه نين ائديب ديلر گؤرمه لي قديم لرين ده حتتا، آدلاريني آپارسام كتاب لار قارالانار،‌فقط آدلاري يازسام جغتايي تورك لرين بوردا هله سايميرام ابن سينا ، فاريابي ، كيم دي سايا آلميرام ابوريحان بيروني ، عليشير نوايي شرقي تورك لري سايسام اليمده ن چيخارسايي بورا دا فقط آذري تورك لرينين سؤزودور همان آذري لر كي ، تورك خالقنين گؤزودور تك جه شاعرليك دگيل بيز باشيديق هرايش ده هر هنرده علم ده، آزادليقدا، دؤيوشده نققاشليق ، مينياتور دا، سئحركارليق ائيله ديك خطي بيزگؤزه لله تديك،گه لين كيمي بزه ديك اوندا ابداع،اختراع تبريزده ن باش قووزادي ان ياخشي خط يازانلار بيزيم يوردوموزدادي ميرعلي تبريزي ، (( علابك )) تبريزي عبداله صيرفي ، هم (( ميرك )) تبريزي (( اظهر‌)) محمد ( منشي ) نظامي تبريزي (( ابراهيم ))، (( علي رضا )) ، ميرزا رضي تبريزي اونلار اوولاد به اولاد خطاط،خوشنويس اولدو تاريخين ديوارلاري خوش خط لري ايله دولدو عبدالقادر مراغي هم اوغلو عبدالرحمان نوه سي عبدالعزيز ، موسيقي شناس لاردان اول لغت كتابين،‌تبريزلي قطران يازدي لاپ كاملين اونلارا ( حسين برهان ) يازدي اوندان صورا گه له نلر،اونو رونويس ائتدي اوبير شاهكار ايدي كي،فارس ديلليني ديريلتدي فارس دادا وار البته شيرن ديللي شاعرلر آنجاق اونلار اؤزلزي بو امري تاييد ائيله ر (( تركان پارسي گوي بخشندگان جانند )) فارسي قوشان تورك لره يوخ دوغرودان همانند آذربايجانين ديلي‌،‌شعرديلي ، ادب ديلي هر يئري بير گلستان ، هر گولده يوز بولبولي شعر و ادب يقين بيل بيزيم نسليميزده دي شيرين صحبت ، شيرين سؤز ، بيزيم اصليميزده دي آذري بولبول لري فارسي چهچه ووردولار آنا ديلي خور اولدو، فارسا بنا قوردولار فارسين ادبياتي بيزده ن شيرينليك تاپدي بيزدن آدي يوكسه لدي، بيزده ن بؤيوك لوك تاپدي فارسين گلستانين دا بيزيم گول لر پاريلدار او گول لره باخانلار،لذذه ت چكيب شاد اولار تورك لرين هنري ايدي كي فارسي شكر اولدو فرهنگي غني لشدي،‌ ديلي پر ثمر اولدو بيز فارس ديلين اوجالتديق اوزاقلارا آپارديق شرقه ، غربه‌،‌شومالا‌،‌آوروپايا آپارديق دونيادا مشهور ائتديك اعتبارين چوخالتديق لاكين اؤز ديليميزي ، ياديميزدان چيخارتديق نتيجه سي نه اولدو ؟ دالي قالديق اؤزوموز هله دييه بيلميريك آنا ديل جه سؤزوموز تاپدالييب ازديلر ايل لر بويو بيزلري ديليميزي باغلادي فارسين شوونيست لري شومال آذربايجاني آيريلماسايدي اگر آذربايجان خالقيندان ، ايندي يوخ ايدي خبر اونلار اولماسايديلار بيزده ن اثر يوخ ايدي شانلي تاريخيميزده ن ، ديل دن اثر يوخ ايدي ايندي ايسه خالقيميز تكليفيني آنلايير آناديلي يول آچير، ايش لري سهمانلاير هر انسانين حاققي دير آناديل جه دانيشماق بو حاقي آلماق اوچون ، ايندي گره ك چاليشماق آغلاماسان ممه يوخ، بودور رسمي دونيانين حاققيني آلماق اوچون لازم اولسا وئر جانين حاققي گره ك آلاسان ايسته مك كافي دگيل ظولمكارا يالواريب ، اينله مك كافي دگيل حاققي گره ك آلاسان آصلانلارين آغزيندان ال ساليب چيخارداسان زور ايلن بوغازيندان قوي ايندي دونيا بيلسين بيزيم ده وار ديليميز قودره ت لي فرهنگيميز، تاريخيميز، ائليميز آسمان ادب ده پارلاق اولدوزلار بيزيك ياز فصلينده شيديرقي ياغان بولوت لار بيزيك اوجا، گؤي لره قالخان، شاهين تيز پرواز هنرده مرد ميدان ، ادب ده نكته پرداز شاعرليك ساحه سينده سبقت دوتان بيز اولدوق علم زمينه سينده ، بدعت قويان بيز اولدوق آزادليق ايستيه نده، بيز هر يئرده باشيديق جنگ لرده بيز ايديك، ائل لره يولداشيديق ايراني بيز ساخلاديق يابانچي دوشمانلاردان باشي اوجا چيخميشيق هميشه ميدان لاردتان ايندي گره ك چاليشاق،داشلي گديك لرآشاق گونشي اله سالاق،افق لره نور ساچاق گئچه ني جبران ائده ك،گئجه گوندوز چاليشاق عالمي حئيران ائده ك ، اود الووا آليشاق پاس باسميش فيكيرلره ايش ايله صيقال وئره ك دؤنوب قالميش ديل لره،شكر وئره ك بال وئره ك هر نه گه لسه ( هدايت ) الين ده ن اسيرگه مه كؤمه ك ائت قلمين دن، ديلينده ن اسير گه مه . 1358 گؤنش ايلي
+ نوشته شده در شنبه 30 تیر1386ساعت 10:34 توسط آراز \|

	يار آغلادي من آغلاديم
يارين بوينون قوجاخلاديم يار آغلادي من آغلاديم ييغيشدي قونشولار بوتون جارآغلادي من آغلاديم باشيندا قارلي داغلارا دانيشتيم آيريليق سؤزون بير اه چكيب باشينداكي قارآغلادي من آغلاديم اوره سوزين ديديم تارا سيملر اولدي پارا پارا ياواش ياواش سيزيلداشيب تار آغلادي من آغلاديم ديديم كي حق منيم كي دير باشيمي چكديلر دارا طناب كسنده بوينومو دار آغلادي من آغلاديم جعفري يم بويم بالا غم سينمده قالاقالا يار جانيمي آلا آلا يار آغلادي من آغلاديم هوشنگ جعفري زنگانين حورمتلي شاعيري
+ نوشته شده در شنبه 30 تیر1386ساعت 10:33 توسط آراز \|

	آذربايجان
سن آنامين قوجاغيسان اوره ييمين بوجاغيسان مدنيت اوجاغيسان آنا يوردوم آذربايجان کئشييينده ائليم دورموش بابک بابام ديوان قورموش دوشمانينا ضربه وورموش آنا يوردوم آذربايجان اوزان لاردان يادگارسان باهار باغلي بير دييارسان کيم دئيه ر کي سن سولارسان آنا يوردوم آذربايجان داغلارينين باشي قاردير باغلار دولو ميوه باردير هر ياندا حؤرمه تين واردير آنا يوردوم آذربايجان تاريخ بويو آدين ـ سانين تؤکولسه ده ناحاق قانين توکنمز دير شرف ـ شانين آنا يوردوم آذربايجان يايلاقلارين صفالي دير گؤزل لرين حيالي دير سئونلرين وفالي دير آنا يوردوم آذربايجان سنه بابک گوونميشدي آتين دان يئره انميشدي تورپاغينا دؤشه نميشدي آنا يوردوم آذربايجان آدين بزک بيزيم ائله گونش لي گونلرين گله يئر اوزونه نور سپه له آنا يوردوم آذربايجان باکي ، تبريز ، گنجه ، اهر آيريلاندا ايچدي زهر بيرلشه جک بير گون سحر آنا يوردوم آذربايجان دان يئرينده اولدوز گلير وطن بايراغي يوکسه لير دوشمانلارين باغرين دلير آنا يوردوم آذربايجان جانلار سنه قوربان اولا چيچک لرين قويما سولا اوره ييميز غمله دولا آنا يوردوم آذربايجان «ممدلي» يم سن منيمسن «آنام دوغما وطنيمسن » صاباحيم سان ، دونه نيمسن آنا يوردوم آذربايجان (شعر : اسماعيل محمد ثاني ـ ممدلي )
+ نوشته شده در شنبه 30 تیر1386ساعت 9:19 توسط آراز \|